Luke 24

Ísu pukáimpinkemba usásinkain-kwasai.

Mátíyu 28:1-10, Mááka 16:1-8, Yóni 20:1-10

1agándon-kanaama úwoi máyówana ánásowasa aaváúmá usónkaꞋa áúraꞋo mápérankanae sésa áséi-kwiyum-basawemba toꞋmayaa úmakom-basawemba maimaésa Ísumbo utamánkaropaꞋa kwésa 2awánomba anón-ontamba óikakemba áꞋa akwátukowasa awánésa 3mimbúrí-áíráꞋá íyúmba Ísóigo Ísun-auma íma kwáyowasa awánésa 4anón-imayaa ésa awánomba kae-kwáásíráí túgáyáagaya ún-unankwatoi urésarai egwaaꞋá máyóyasa tuwánésa 5táátavai ésa kívairowasarai sésarai púwísaꞋo máankaraam-buri-aivimba íma máyáivo usásinena kóuraivo íma maampímbá avakáá-oro. kwemá KárírivaꞋa úwoimo máyáinkaꞋa simátímakain-aimba imáyáa oro. 7maará séna kembá kwaási úrandakomba sáwí-kwaasiraꞋa timíyasa sínkamiyaꞋa puwéꞋa kaumbo-táwai maisuwéꞋa usásinanaumne siráiye suyasá 8isésa simátímakain-aimba táákaꞋa marésa 9mimbúrí-áímá tuwésa kwésa Ísuna kwayó-kwáásí sísamaivakemba moórá kumbaimái-kwaasiye óꞋon-kwaasiye mináímbá kosimátimesa 10minínímbá moórá Mágátáraa-naopaken-ininko áwíꞋa Máríyaa úwana moórá araámáó kwemá Yémésimba anówama úwana moórá Yóánana úwasa miwísé máyón-inimba Ísuna aantá-kwáásíyávésa mináímbá kosimátímúwasa 11isésa sésa úwoi kampar-áímbá sewé simásuwesa úwoi máyówananivo 12Pítaa usásinena isaaiséna utamánkóm-buri-aivimba kokívairena awánómba ampantanéímó asááúmaesamo máutamankaron-ampantawe suꞋmai kwáyowana awánéna koyauweréna mindáyavena anón-imayaa uráiye.

Éméyási-naor-ampaꞋa Ísumba awánaraayan-kwasai.

Mááka 16:12-13

13anón-imayaa úwasarai mitáwai Ísuna kwaásivinkemba kaeꞋnárai Éméyási-naopaꞋa kóyáe siráái. mindáópaꞋa YérúsaremuvaꞋa ayáátáákakaamba kwáyowasarai Éméyási-naopaꞋa kóyáe sésarai YérúsaremuvaꞋa tuwésarai aampaꞋá kwégwesarai 14Ísumbo éiron-aimba símaesarai kwéguyana 15Ísu egwaaꞋá téna minkáéꞋnáraiye kwéguwasarai 16awánoyana Áánútu túrampaꞋa túntinkarowasarai íma aúyamai kawer-uyaná 17Ísu séna nóin-aina aampaꞋá símae kwégooiyo súwasarai minká komésarai tirunkó sáwíꞋa kwéuwasarai 18moóráwai áwíꞋa Kéríyópasi kwemá séna ívé-kanaama Yérúsaremu-naopaꞋa tóyo ésa éiraan-tantaaꞋa awánaraavo eyááma íya awánaraano áísaa ena súwana 19Ísu séna nóra éiraanaꞋiyo súwasarai mindárai sésarai Ísu Násáretivakewaintavairai kwésuye. Áánútun-aai siráiwai Áánútu aúrankaꞋa asirayám-báyáí kwémaena asirayán-áímbá kwésimasimisata ísaraumne. 20kentáásí anón-kwaasiye mono-káwáá-kwáásíyé Ísumba tuvuwíyanesa Árómáani-kamaani-kwaasigomba áméwana owé sisasá taairaꞋá tuvúwówana pukáiye. 21kesáá Ísareri-kwaasiya séta kentáásí kawáánáríꞋa éna Árómáani-kamaani-kwaasi usáyaaitaniyeya siráundaya tuvúwówana pukáiye. moórá-ainkwaraꞋa kwáyáiye. tuvúwówana pukáimba kaumbo-táwai maisukáiye. 22évakar-inimbo simásímén-ainta sáátavaiya kwéune. ívéꞋa aaváyaavimba ááéma utamánkaraapaꞋa kombá 23kwenáúma íma kwáyáísasa koawánésa koyauwerésa tésa sésa kwíyómpakendarai tuwánáúnasaraiya sésarai pukáimpinkemba usásinkaiye séye tasewatá 24kentáávínkémbá évakarawai utamánkaraapaꞋa koawánaawana minínímbó sentembá mirá éna íma kwáyáísasa awánaawe suyaná 25Ísu séna sáwí-imayaagwaraꞋa óye. naaóváꞋá Áánútun-aai simátímakowai agaimarésa siráan-aintavekai íma ááéma áraire kwéseye. 26Áánútu usásinankaiwaimba áíꞋa índaiꞋa umánkanaaombanivo ságayan-ayampaꞋa uméniye mirám-biran-aimba Áánútu siráiye. 27Áánútun-aai aúváívinkemba kwentávésa siráan-ainkona ááimba simátímakaiye. mináímbá Mósesi agaimaréna siráin-ainkwara minkákémbá Áánútun-aai sirón-kwaasi agaimarésa siráan-ainkwaraꞋa simátímakaiye.

28simátimuwasarai kuyan-dáókona egwaaꞋá kuyaná Ísu kógwéyaaitowasarai 29mindárai tátoresarai asiramái sésarai sáwíyankaꞋa enánivo kesérai méniyone suyaná mindáraiye naaúmpaꞋa uména 30toómbá náíyanesa kwéuwana toómbá maisoréna ÁánútumpaꞋa súwi séna topámbai timúwasarai 31awánésarai Ísumba aúyoyana áúyokuwasarai 32sésarai aampaꞋó túyanamo Áánútun-aai aúváívinkemba simásímísanarai sirunkó anón-aamoi kwéiye sirááiye.

33mináímbá simásuwesarai usásinesarai koyauwerésarai Yérúsaremu-naopaꞋa tuyambá Ísuna kwayó-kwáásí sísamaivakemba moórá kumbaimái-kwaasiye óꞋon-kwaasiye torupamái máyómba tuwánoyasa 34miwí sésa áraiꞋa Ísóigo pukáimpinkemba usásinena SáímoninopaꞋa paárisana awánériye suwasaráí 35mindárai aampaꞋó kuyan-áímbá simátimesarai sésarai toómbá topámbai símísakai Ísóigomba aúyarauye sirááiye.

Ísuna kwaási kwembá awánaraan-kwasai.

Mátíyu 28:16-20, Mááka 16:14-18, Yóni 20:19-23

36mináímbá kwésuyana Ísu paáréna miwítí avumpimbá ména aánoumai máéro súwasa 37inkaisésa kwaántá sewé sésa táátavai uwaná 38Ísu séna íma tááꞋa kaíno. íma kaer-ímáyáá éꞋa 39siyáánarumpin-avigwara sísamaivin-avigwaraꞋa awánéꞋa kentávéꞋa kwemán-iye seró. kwaántá-kwaasi amagwárá ayáántánkwaraꞋa íma kwáyáivo kembá úwoi kwáyáivo suwánéꞋa sineꞋá tátoraaro 40Ísu simásuwena ayáánarumpin-avigwara aísamaivin-avigwaraꞋa agaráátinkowasa 41anón-aamoi kwéesa táátavai ésa anón-imayaa kwéuwana kwaántán-iye sevó séna Ísu naí-yántááꞋá makáao tísaa ena súwasa 42agaimakón-doyaaꞋa ámúwana 43maimái túrankaꞋa naráiye.

44násuwena simátimena séna kesé úwoi máyaundaraꞋa maará séꞋa kentávéna Mósesi agaimaréna siráin-ainkwara Áánútun-aai sirón-kwaasi agaimarésa siráan-ainkwara monor-ímá agaimarésa siráan-ainkwaraꞋa áraiꞋa paáriniye simátímakaundawe. 45Áánútun-aai aúváí-kwandaaivinkemba kaweꞋá umái isánááontavena miwítí imáyáa kaweꞋá umátínkaraiye. 46Áánútun-aai aúváí-kwandaaivimba agaimaréna séna Áánútumo usásinankaiwaimba áíꞋa índaiꞋa umánkaiyana puwínímbanivo kaumbo-táwai maisuwéna usásinainasa 47kwená asirayánkwáráꞋá mésa aivaꞋá Yérúsaremu-naopaꞋa simátimesa minkákémbá óꞋon-oꞋom-baravaken-kwaasi mósimatim-besimatin-esa sésa kentí sáwí-imayaa tuwéꞋa ÁánútumpaꞋa tíyana kentí sáwí-imayaa maitiyuwáníye agaimaréna siráiye. 48awánaan-aimba simátímaꞋmaeꞋa koró. 49kesivo asiramái séna tíméndawaimba aiꞋmáráanana keinárawate kumbéniye. Yérúsaremu-naopaꞋa máyaiyana keinárawapimba kumbéna kwíyómpaken-asirayamba timínaꞋa awánaan-aimba simátímaꞋmaeꞋa koró Ísu siráiye.

Áánútu Ísumba airówana iráin-kwasai.

Mááka 16:19-20, aantá-kwaasi 1:9-12

50simásuwena Ísu tíꞋmaena YérúsaremuvaꞋa tuwéna Pétáni-naor-egwaaꞋa koména ayáándei káátarena séna Áánútu kaweꞋá umátinkaiye 51kwésimatimuwana Áánútu airówana kwíyómpaꞋa iyúwasa 52Ísuna imáyáa ésa áwíꞋa mósá marésa tirunkó anón-aamoi kwéuwasa koyauwerésa Yérúsaremu-naopaꞋa tésa 53aasiyaasi-táwai anóm-bonoꞋ-naumpaꞋa kwéiyesa Áánútu áwíꞋa mósá makáawe.

Árúku kemá súnda-aimba ánásaiye.